Многу патници барем еднаш се запрашале дали изборот на седиште може да им ги зголеми шансите за преживување во случај на авионска несреќа. Иако воздушниот сообраќај важи за еден од најбезбедните начини на патување, несреќи сепак се случуваат, а прашањето за „најбезбедното место“ во авионот со години ги интригира експертите и патниците, пишува „Јунилад“.

Некои веруваат дека најдобро е да се седи над крилјата, бидејќи тоа е најцврстиот дел од авионот. Други сметаат дека задниот дел нуди поголеми шанси за преживување. Но, според професорката Хелен Мјур, поранешна директорка на Институтот за безбедност, ризик и доверливост при Универзитетот Кранфилд, не постои едноставен одговор.

„Не постои точно најбезбедно место во авионот, бидејќи за да се одговори на тоа прашање, би требало однапред да знаете на кој начин авионот ќе удри во земјата“, изјавила таа за Би-би-си.

Причината е едноставна – ниту една авионска несреќа не е иста. Во некои случаи прво удира предниот дел на авионот, во други задниот дел, крилото или средишниот дел. Дополнителен фактор се пожарите, кои можат да избувнат на различни места во леталото.

На пример, ако авионот удри со предниот дел, патниците назад би можеле да имаат подобри шанси. Но, ако избувне пожар во задниот дел, тогаш седиштата напред би биле побезбедна опција.

Сепак, професорката Мјур има еден практичен совет – да се избира место што е поблиску до излезите за евакуација.

„Јас лично претпочитам да седам во дел од авионот од каде што имам пристап до повеќе излези. Веројатно тоа е последица на моето искуство како истражувач на авионски несреќи“, објаснила таа.

Таа додава дека модерните авиони се дизајнирани така што секое седиште има приближно еднакви шанси за преживување, под услов патниците навреме да можат да се евакуираат.

Кога станува збор за тоа што треба да направите во случај на несреќа, советот е едноставен: седнете на местото што ви е доделено и однапред забележете каде се наоѓаат најблиските излези за итни случаи.

„Искористете ги сите можности што ги имате во ваша близина за да можете брзо да излезете доколку се појави потреба“, советува експертката.

На крајот, и покрај сите теории за најбезбедните седишта, експертите се согласуваат дека најважни се почитувањето на безбедносните упатства и брзата реакција во случај на итност. А најбезбедното место, како што на шега велат некои, сè уште останува аеродромската чекалница.

ВИДЕО: Наместо во Македонија, Руси заглавиле на аеродром зашто му верувале на „Четџипити“