На 20 јуни 1922 година во Галичник е роден Александар Сариевски, еден од најзначајните македонски интерпретатори на народна музика, човек чие име и денес е неразделно поврзано со најубавите бисери на македонската песна.

Речиси и да нема љубител на народната музика кој не ја препознава неговата изведба на „Зајди, зајди јасно сонце“, песна што токму преку неговиот глас доби безвременска димензија. Со својата специфична интерпретација, емоција и автентичен пристап, Сариевски остави длабока трага во македонската култура и стана едно од најпрепознатливите лица на народната музика во 20 век.

Роден во мијачкиот крај, Сариевски уште од младоста покажувал интерес за музиката. По преселбата во Скопје почнал да свири хармоника, а неговата професионална кариера започнала по Втората светска војна. Во 1946 година ја снимил песната „А бре невесто око калешо“ за тогашното Радио Скопје, што претставувало почеток на една исклучително плодна музичка приказна.

Во текот на својата кариера снимил стотици песни, од кои многу денес се сметаат за дел од националното музичко наследство. Неговите изведби на „Дејгиди луди млади години“, „Абер дојде Донке“, „Јано мори“, „Зајко кукурајко“ и бројни други композиции остануваат пример за врвна интерпретација на македонската народна песна.

Сариевски бил меѓу основачите на ансамблот Танец, со кој настапувал на многубројни турнеи низ светот. Преку концертите на различни континенти ја претставувал македонската традиција пред илјадници луѓе и придонел народната музика од Македонија да допре до публика далеку надвор од границите на земјата.

Освен како пејач, бил познат и како одличен музичар, а во одреден период раководел и со Оркестарот на народни инструменти на тогашната Радио-телевизија Скопје.

Александар Сариевски почина на 19 декември 2002 година, но неговите песни продолжуваат да живеат и денес. Неговите снимки сè уште се емитуваат на радио и телевизија, а новите генерации преку нив се запознаваат со богатството на македонскиот музички фолклор.