Што ако на првиот состанок, наместо да се претставите како најдобрата верзија од себе, се појавите токму такви какви што сте? Без преправање, без глумење и без обид да оставите совршен прв впечаток. Иако на многумина ова можеби им звучи необично, сè повеќе луѓе го прифаќаат токму овој пристап. Новиот дејтинг тренд се нарекува „гоблин-интимност“ (goblin intimacy) и се темели на идејата уште од самиот почеток да го покажете своето вистинско лице и да си ја откриете „најлошата страна“ – со сите доблести, недостатоци, несовршености и животни искуства, пишува „Индекс“.

Идејата е едноставна: ако некому не му одговарате такви какви што сте, подобро е тоа да се открие веднаш отколку по неколку месеци врска.

Што претставува „гоблин-интимноста“?

Според експертите, станува збор за своевиден отпор кон разубавената реалност која доминира на апликациите за запознавање.

„Гоблин-интимноста е своевиден роднина на таканаречениот гоблин-режим“, вели советничката за партнерски односи Ејми Чен.

„Тоа е бунт против состаноците на кои луѓето глумат верзија од себе за која мислат дека најмногу ќе ѝ се допадне на другата личност. Наместо тоа, се појавувате како вистинскиот вие – со сите свои чудни карактеристики, навики и несовршености.“

Во време кога апликациите за запознавање и вештачката интелигенција сè повеќе влијаат врз начинот на кој луѓето создаваат врски, не е изненадување што дел од сингл луѓето бараат целосна искреност уште од самиот почеток.

Советничката за врски Дамона Хофман смета дека многумина се уморни од претставување на идеализирана верзија од себе и од различните „правила“ за освојување.

„Разбирам зошто овој тренд е привлечен. Луѓето се уморни од преправање и од љубовни игри“, вели таа.

„Сè почесто се поставува прашањето што денес е вистинско, а што не. Многумина сфатија дека разни правила и трикови не функционираат за секого и дека е многу поважно да пронајдат личност на која ќе ѝ се допаднат токму такви какви што се.“

Токму затоа, наместо внимателно да ги кријат своите недостатоци, сè повеќе луѓе уште на првиот состанок отворено ги покажуваат своите навики, слабости и особености, верувајќи дека искреноста е најдобрата основа за долгорочна врска.

Сте слушнале ли за „Вандерлав“? Новиот летен дејтинг тренд не е за „слаби“