Првиот човек на Светската здравствена организација за Европа, Ханс Клуге денеска изјави дека во Украина починале најмалку 3.000 луѓе од почетокот на руската инвазија во февруари, бидејќи немале пристап до третмани за хронични болести.

Досега, здравствената агенција на Обединети нации има документирано околу 200 напади во Украина врз здравствени институции, а сега функционираат само неколку болници, наведе Клуге на регионалниот состанок на 53 земји-членки на СЗО, како и високи колеги од агенцијата.

Тој истакна дека 40 проценти од домаќинствата имаат најмалку еден член, кој не добива третман за хронична болест, како што се ХИВ/СИДА и ракот и тоа резултира со околу 3.000 прерани смртни случаи, што можеа да се избегнат.

Шефицата на Мисијата за набљудување на правата на ОН во Украина, Матилда Богнер посочи дека забележала пораст на стапката на смртност поради недостаток на пристап до нега.

– Правото на здравје е сериозно погодено низ целата земја, истакна Богнер.