Во просториите на поранешната гостилница „Кај Злате“, денеска се отвори првиот Дневен центар за лица со интелектуална попреченост над 18 години. Центарот „Пролет“ ќе работи секој ден од 8 до 16 часот, а лицата ќе бидат во придружба на координатор. Нив два пати неделни ќе ги посетува лекар, дефектолог, психолог и социјален работник.

Секретарот на Црвениот крст на Град Скопје, Сузана Тунева- Пауновска, денеска, на отворањето на центарот рече дека преку овој центар ќе се обидат да ги интегрираат возрасните лица со интелектуална попреченост, во општеството.

“Дневниот Центар преку организирање на креативни работилници и едукации ќе има за цел социјализација и интеграција на лицата со интелектуална попреченост во општеството. Јас очекувам овој центар да прерасне во место за дружење. Ние ќе ги следиме нивните потреби, а во пресрет ќе им излегуваме и на нивните семејства и родители“, рече Тунева- Пауновска.

На отворањето присутни беа и градоначалниците на Град Скопје и на Општина Центар, Петре Шилегов и Саша Богдановиќ, со чија поддршка поранешниот ресторан е даден на користење на возрасните лица со инмтелектуална попреченост.

„Среќен сум што објекти кои претходно биле предодредени за други намени, успеавме да ги претвориме во центри кои со години биле потребни на нашите граѓани, а посебно се потребни на лицата со интелектуална попреченост над 18 години“, рече градоначалникот.

Шилегов пак, рече дека активното учество на локалната заедница во обезбедување на поквалитетен живот за сите наши граѓани е клучно за развојот токму на целата заедница.