МЗТ Скопје Аеродром и Пелистер ќе играат во АБА2 лигата

МЗТ Скопје Аеродром и Пелистер ќе ја претставуваат Македонија сезонава во АБА2 лигата/Фото: kfsm.mk

Како што официјално денеска е соопштено, 14 клубови ќе бидат дел од новата натпреварувачка сезона 2021/22 на АБА2 лигата.

Врз основа на резултатите во домашните шампионати и земајќи ги предвид резултатите во сезоната 2020/21 на АБА2 лигата, 12 екипи си го стекнаа правото да учествуваат во сезоната 2021/22 на АБА2 лигата.

Тие се Борац Бања Лука (Босна и Херцеговина), Горица (Хрватска), Ловќен 1947 (Црна Гора), Хелиос Санс (Словенија), Младост Максбет (Србија), МЗТ Скопје Аеродром (Македонија), Пелистер (Македонија), Подгорица (Црна Гора), Рогашка (Словенија), Спарс (Босна и Херцеговина), Сутјеска (Црна Гора) и Војводина (Србија).

Останатите две места ќе бидат пополнети со вајлд карти.

Засега нема потврда на начинот на кој ќе се игра, но речиси е сигурно дека тоа ќе биде идентично како во минатиот шампионат, односно еднокружно на неколку турнири, по што осумте првопласирани ќе продолжат во плејофот.

Новитет што се планира е доигрувањето да се игра класично, само еден меч па кој победи оди понатаму, наместо како минатата сезона со два натпревари и победник според вкупната кош-разлика.

Видео на денот