Мото ГП: Бањаја до пол-позиција и рекорд во Ле Ман
Италијанскиот мотоциклист Франческо Бањаја ја освои пол-позицијата пред трката за Големата награда на Франција. Неделната трка е на програмата од 14.00 часот.
Возачот на Дукати имаше време од 1:30.450 во квалификациите, што е најбрзиот круг на патеката во историјата.
Италијанецот до пол-позицијата во Франција стигна две недели по првата победа сезонава во Херез.
Фабио Квартараро беше најбрз речиси во текот на сите квалификации, но на две минути пред крајот иницијативата ја презедоа возачите на Дукати Франческо Бањаја и Џек Милер. Десет возачи ги завршија квалификациите во Ле Ман во седум десетинки.
Второ време во квалификациите постигна Милер (+0,069), додека трет беше Алеш Еспаргаро.
По нив следуваа Фабио Квартараро, Енеа Бастијанини, Жоан Зарко, Жоан Мир, Алекс Ринс, Хорхе Мартин и Марк Маркез.