Мекларен го тужи шампионот во Индикар и бара отштета од 23 милиони долари
Алекс Палу требаше да му се придружи на Мекларен од идната година, но, се пишмани, по што тимот реши да го тужи и да бара голема отштета
Тимот на Мекларен го тужи шампион во Индикар, Алекс Палу и бара отштета од преку 23 милиони долари, откако шпанскиот возач се откажа од договорот со гигантот.
Палу ја освои титулата во американската тркачка серија Индикар оваа сезона со 78 поени предност, што е негова втора титула во три сезони, но летово му рече на Мекларен дека нема да им се придружи – што предизвика правна битка.
Гигантот во Формула 1 Мекларен има свој тим Ероу Мекларен и во Индикар серијата и очекуваше Палу според договорот да му се придружи во 2024 година.
Палу возеше за Чип Ганаси рејсинг-тимот во Индикар, а веќе беше во една правна битка за да го напушти тој тим една година порано и да се придружи на Ероу Мекларен. Тој е тест возач за Мекларен во Формула 1 сезонава.
Парите што ги бара Мекларен, наводно, се поврзани со спонзорствата што тие очекуваа да ги донесе Шпанецот поврзани со неговиот ангажман во тимот, како и со трошоците поврзани со неговото напредување за место во Ф1 и аванс на неговата плата во 2024 година.