Лотар Матеус: Тоа беше фарса – Халанд повеќе ја заслужи „Златната топка“ од Меси
Германската фудбалска легенда Лотар Матеус верува дека Ерлинг Халанд ја заслужил „Златната топка“ повеќе од Лионел Меси: „Тоа беше фарса“.
Добитникот на „Златната топка“ во 1990 година, не беше среќен што Меси ја освои престижната награда по осми пат во кариерата во понеделникот.
– Халанд се снајде подобро од Меси цела година – изјави 62-годишниот Матеус за „Скај Германија“, цитиран од „Ла Гаѕета дело Спорт“.
– Оваа награда не е заслужена и докажува дека Светското првенство брои повеќе од сè. За мене никој не беше подобар од Халанд, тој беше најдобар во последните 12 месеци. Со Манчестер сити освои важни титули, поставувајќи рекорд по голови. Тоа беше фарса, дури и ако отсекогаш сум бил фан на Меси – вели Матеус.
Германецот ја освои и Златната топка откако ја предводеше својата земја, тогашна Западна Германија да ја освои титулата на СП 1990 во Италија. Поранешната ѕвезда на Интер постигна 53 гола во 153 настапи со миланските „нераѕури помеѓу 1988 и 1992 година.
Тој ја освои титулата во Серија А во сезоната 1988-89, и Купот на УЕФА, сега Лига Европа, во 1990-91.