Потрагата по новиот Џејмс Бонд продолжува да биде една од главните теми во филмскиот свет, а најновите гласини носат неочекуван пресврт. Во центарот на приказната е Лорен Санчез, сопругата на милијардерот Џеф Безос, која според гласините игра клучна улога во изборот на следниот агент 007.

Откако компанијата на Безос, „Амазон“, го презеде филмското студио „МГМ“, кое стои зад франшизата Бонд, во 2022 година, се шпекулираше за влијанието на неговата сопруга врз продукцијата.

Според британскиот новинар за шоубизнис Роб Шутер, 56-годишната Санчез станала „тивкиот шеф кој лебди над универзумот на Бонд“. Шутер тврди на својот блог дека таа го има последниот збор.

– Сега Лорен треба да одлучи. Ако не те сака, готово е – напишал тој.

Шутер исто така наведува дека Санчез веќе го избришала името на популарниот актер Џејкоб Елорди од листата со предлози. Поранешната новинарка наводно верува дека 28-годишниот Австралиец „не е она“ што го бара и дека носи премногу „емоционален багаж“. Се тврди дека нејзината визија за Бонд е актер кој е „мазен, шармантен, глобално привлечен“.

Сепак, извори блиски до продукцијата силно ги негираат овие обвинувања. Извор близок до продукцијата изјави за „Дејли мејл“: „Не, таа не го избира следниот Џејмс Бонд. И не, таа нема да биде девојка на Бонд – освен можеби за Ноќта на вештерките“.

Додека дискусиите продолжуваат за улогата на Лорен, се чини дека се појави нов фаворит за престижната улога. Тоа е 35-годишниот британски актер Калум Тарнер, кој наводно е толку уверен дека ќе ја добие улогата што веќе веста ја споделил со пријателите, објавува „Ајриш Стар“.

– Тој ја рашири веста низ целиот град. Калум е новиот Бонд. Сите во неговиот круг зборуваат за тоа. Тоа е најлошо чуваната тајна – рекол извор.

Гласините се надополнуваат со неговата врска со пејачката Дуа Липа. Двојката, која се сврши летото 2025 година, неодамна помина време на Јамајка во Голденај, поранешниот дом на авторот на Џејмс Бонд, Иан Флеминг.

Извори тврдат дека Дуа е воодушевена што нејзиниот свршеник ќе стане новиот 007 и се надева дека таа ќе ја сними тематската песна за новиот филм.