Легендарниот музичар Клиф Ричард, 85, откри дека изминатата година се лекувал од рак на простата.

Клиф ја откри својата дијагноза во интервју со поранешниот водител на „Скај њуз“, Дермот Мурнаган, на кого претходно му беше дијагностициран рак на простата во четврти стадиум. Тој рече дека ракот исчезнал и ги поддржа повиците за национален скрининг тест за мажи.

– Требаше да одам на турнеја… Требаше да одам во Австралија и Нов Зеланд, а промотерот рече: „Па, ни треба вашето осигурување, ќе мора да се тестирате“. Открија дека имам рак на простата, но за среќа не беше многу стар. А, другата работа е што не метастазирал. Не се проширил на коските или нешто слично – рекол Клиф, додавајќи дека ракот е „апсолутно исчезнат“.

– Не знам дали ќе се врати. Мислам, никогаш не се знае со овие работи, но апсолутно мораме, сигурен сум, да излеземе таму, да се тестираме, да се провериме. Мислам дека ние, како мажи, мора да се гледаме како човечки суштества кои можат да умрат од ова – додал тој.

Мурнаган го праша пејачот и дали ги поддржува повиците за национална програма за скрининг на рак на простата, со оглед на тоа што болеста е „најчестиот рак кај мажите“.

– Имаме влади кои се грижат за нашата земја и за оние кои живеат во таа земја. Сите заслужуваме да имаме еднаква можност да се тестираме, а потоа да започнеме со третман многу рано. Помина само една година откако бев во контакт со рак, но всушност, секој пат кога разговарав со некого, ова беше споменато, па мислам дека нашата влада треба да нè слуша –  одговорил тој.

Ричард ја сподели веста за својата битка откако кралот Чарлс откри дека стигнал до „пресвртница“ во сопствената битка и дека ќе може да го намали распоредот за лекување во новата година. Во својата изјава, тој ја нагласи важноста на раната дијагноза на болеста.

– Ја слушнав оваа порака многу пати за време на моите посети на центри за рак низ целата земја. Исто така, знам каква разлика направи раната дијагноза во мојот случај, дозволувајќи ми да продолжам да водам целосен и активен живот, дури и за време на третманот. Денес можам да ја споделам со вас добрата вест – благодарение на раната дијагноза, ефикасната интервенција и почитувањето на упатствата на мојот лекар, мојот распоред за лекување на рак може да се намали во новата година. Оваа пресвртница е и личен благослов и доказ за извонредниот напредок што е постигнат во лекувањето на ракот во последните години, доказ за кој се надевам дека ќе ги охрабри 50% од нас на кои ќе им биде дијагностицирана болеста во одреден момент од нашите животи-  рекол кралот во своето обраќање.

Бакингемската палата не откри со каков вид рак се бори Чарлс, но е потврдено дека не станува збор за рак на простата.