Лавров: „Обидите на Западот да ја изолира Русија целосно пропаднаа, Путин има голем број странски партнери“
Обидите на Западот да ја изолира Русија целосно пропаднаа бидејќи претседателот Владимир Путин има голем број различни странски партнери истакна денеска рускиот министер за надворешни работи Сергеј Лавров кој одржа говор во Советот на Федерацијата, што е горниот дом на рускиот парламент, пренесе руската државна новинска агенција ТАСС.
„Политиката насочена кон изолација на Русија не успеа. Доволно е да се споменат бројни примери на интеракција меѓу претседателот Путин и неговите странски колеги. Ние, како што можете да видите во реалноста, сме подготвени за таков предизвик и ќе продолжиме цврсто да ја браниме нашата вистина“, истакнал Лавров.
Ние не се прилагодуваме на концептите и шемите предложени од други земји, додал тој.
„Ние сами ја обликуваме надворешнополитичката агенда, водејќи се од нашите сопствени приоритети, почитувајќи ги признатите норми на меѓународното право и земајќи ги предвид интересите на нашите партнери кои се подготвени да соработуваат со нас врз основа на взаемно почитување и уважување на суверените интереси“, рече Лавров, пренесува ТАСС.