Македонскиот пејач Ламбе Алабаковски денеска ја допре јавноста со емотивна објава по повод роденденот на неговата покојна мајка Маријана, која почина во 2006 година.

„Среќен небесен роденден, мама“, напиша Алабаковски на својот фејсбук-профил, објавувајќи стара црно-бела фотографија од младоста на мајка му.

Маријана почина прерано, оставајќи длабока празнина во животот на својот син. Ламбе тогаш имаше само 18 години и токму тогаш ја доживуваше својата најголема слава на македонската музичка сцена.

Во едно претходно интервју за „Слободен печат“, пејачот зборуваше и за важната улога на неговото семејство, особено на татко му и баба му, кои му биле столб по загубата на мајка му.

„Татко ми е веќе пензионер и секогаш е на моја страна, поддршка за сѐ. Често знаеме и заедно да музицираме, да пееме – така се одржуваме и во добра кондиција. Мило ми е што е вљубеник во природата и планината“, изјави пејачот за „Слободен печат“.

Се присети и на својата баба Менка, која имала посебно место во неговото срце.

„Често ја спомнуваме баба ми Менка. Беше преполна со љубов кон сите луѓе – тоа ни остана како пример и спомен какви треба да сме кон луѓето: со многу љубов и разбирање. Често пеевме заедно. Сакаше да пееме и да ме гледа кога настапувам. Велеше: ‘Од сите талентирани во фамилијата, ти најмногу успеа. Да си ми здрав и жив’“, раскажа Алабаковски.

Интервју со Ламбе Алабаковски: Моите претрпеа страв да не останам по судници