Крај и во Бундеслигата, Кил прогласен за шампион
РФМ веќе даде предлог, претходно одлучија федерациите на Унгарија и Франција, а сега и во Германија предвреме завршува натпреварувачката сезона 2019/2020.
Челниците на еден од најсилните ракометни шампионати во светот денеска официјално соопштија дека сезоната 2019/2020 е завршена.
Поради пандемијата на коронавирус донесена е одлука екипата на Кил да биде прогласена за шампион во Бундеслигата. До прекинот на сезоната во најсилната германска ракометна лига, Кил водеше со 44 бодови, два повеќе од второпласираниот Фленсбург.
36 Profiklubs stimmen mit sehr deutlicher Mehrheit für den Abbruch https://t.co/30RINzeXTP
— LIQUI MOLY HBL (@liquimoly_hbl) April 21, 2020
Втор патник во Лигата на шампионите ќе биде составот на Фленсбург, додека во новоформираната лига (досегашниот ЕХФ куп) учесници се Магдебург, Рајн Некар Левен и Хановер. Од елитниот ранг нема да испадне ниту една екипа. Од следната сезона македонскиот репрезентативец Филип Кузмановски ќе игра за екипата на Хановер.
Кобург како шампион во втората германска лига, заедно со Есен од натпреварувачката 2020/2021 ќе играат во елитата.
Истиот потег се случи и во Франција, титулата ја освои ПСЖ на нашиот поранешен селектор Раул Гонзалез, додека во Унгарија не беа прогласени победници.
Сега останува да се види што ќе одлучат од Ракометната федерација на Македонија која пред пет дена даде предлог за предвремено завршување на сезоната.