Лидерот на СДСМ, Димитар Ковачевски, вечерва на прес конференција по седницата на Централниот одбор на партијата, ги објави новоименуваните потпретседатели: Перо Костадинов, Стефан Богоев, Фатмир Битиќи и Бисера Костадиновска Стојчевска.

Тој посочи дека, како што се најавуваше, за генерален секретар на партијата е именуван Миле Зечевиќ.

Ковачевски најави дека новата влада ќе биде составена најдоцна до 18 јануари и дека таа ќе биде ориентирана на економијата, заштитата на здравјето, како и финансиската поддршка.

„Ќе ја реформира и реорганизираме партијата“, најави новоизбраниот лидер на СДСМ, кој вечерва доби доверба од највисоките партиски тела да биде мандатар на новата влада.

Тој рече дека ќе се формира советодавно тело, наречено Совет за креирање и имплементирање политики, за да ги надгледува проектите на партијата , а со него ќе раководи Игор Ивановски.

„СДСМ за разлика од ВМРО-ДПМНЕ е одговорна и државотворна партија и така ќе продолжи да работи. СДСМ почнува ново поглавје во својата историја, заклучи лидерот на Социјалдемократскиот сојуз.