Стручно мислење од ЈЗУ Центар за јавно здравје-Тетово, изработено на 29 јуни годинава, покажало дека „водата одговара на законските и стручни прописи во однос на испитаните параметри за бактериолошка и физичко-хемиска анализа“. Само дваесетина дена подоцна, 3.100 граѓани на Гостивар на возраст од една до 80 години побарале здравствена помош поради дијареја, повраќање, истоштеност и температура.

Полицијата и Обвинителството истражуваат дали тоа што ЈП „Комуналец“ Гостивар на диво приклучило три пумпи директно од отпадни води во централната водоводна мрежа, има врска со симптомите што ги пројавуваат граѓаните.

Сепак, се поставува прашањето, како водата можела да биде исправна на документ издаден од ЈЗУ Центар за јавно здравје Тетово на 29 јуни 2026 година, само неколку денови откако биле инсталирани пумпите на диво?!

Гостиварски „Водовод“ има договор за јавна набавка со скопскиот Центар за јавно здравје двапати во годината да бидат земени мостри за тестирање на квалитетот на водата. Но, сепак оваа анализа според која „водата е добра“ е издадена од Центарот за јавно здравје Тетово, локација Гостивар.