Вообичаените конзерванси што се користат во многу индустриски произведени намирници со цел спречување на развој на бактерии и мувла се поврзани со 29 отсто поголем ризик од покачен крвен притисок и 16 отсто поголем ризик од срцев и мозочен удар, покажало ново истражување на француски научници, пренесува „Си-ен-ен“.

Студијата покажала дека дури и таканаречените „природни“ антиоксидативни конзерванси, кои се користат за спречување на промена на бојата на храната, како лимонската и аскорбинската киселина (витамин Ц), го зголемуваат ризикот од хипертензија за 22 отсто кај лица кои почесто консумираат производи со овие состојки.

Авторката на истражувањето Матилд Тувие од Францускиот национален институт за здравје и медицински истражувања навела дека аскорбинската киселина која природно се наоѓа во овошјето и зеленчукот не е иста со индустриски додадената аскорбинска киселина, која може да биде хемиски произведена и да има различно влијание врз здравјето.

Истражувањето, објавено во списанието „Европски журнал за срце“, опфатило повеќе од 112 илјади луѓе постари од 15 години кои учествуваат во долгорочниот проект НутриНет-Санте, во рамки на кој од 2009 година се следат прехранбените навики на населението во Франција.

Научниците анализирале влијание на 58 конзерванси врз кардиоваскуларното здравје и утврдиле дека осум од нив се поврзани со поголем ризик од развој на висок крвен притисок во следната деценија.

Меѓу најпроблематичните конзерванси се издвоени калиум-сорбат, калиум-метабисулфит и натриум-нитрит, кои се користат во вино, пекарски производи, сирења, преработено месо и ферментирани пијалаци. Покрај тоа, зголемен ризик од хипертензија е поврзан и со конзерванси како лимонска киселина, натриум-аскорбат и екстракт од рузмарин, кои се користат за спречување на оксидација на храната.

Стручњаците наведуваат дека ултрапреработената храна одамна предизвикува загриженост поради високата содржина на шеќер, сол и масти, но дека тие фактори сами по себе не ја објаснуваат целосно нејзината штетност.

Претходни истражувања на истиот тим поврзале одредени конзерванси и со зголемен ризик од рак и дијабетес тип 2.

Авторите на студијата препорачуваат потрошувачите да даваат предност на свежи и минимално преработени намирници, како и на замрзната храна што се чува на ниски температури наместо со хемиски конзерванси.

Иако истражувањето не докажува директна причинско-последична врска, експертите оценуваат дека резултатите претставуваат сериозен сигнал кој бара дополнителни истражувања, пренесува Танјуг.