Контроверзниот француски тенисер Беноа Пер зборуваше за невакцинираните тенисери и порача дека не го интересира што тие нема да можат да настапат на Австралија Опен кој се игра во јануари идната година.

Французинот кој се наоѓа на 47. место на АТП ранг листата е поразен во првото коло на Мастерсот во Париз, но вели дека со нетрпение го очекува настапот на првиот грен слем идната година.

– Во Мелбурн нема карантин доколку си вакциниран. За тие кои не се вакцинирани гајлме ми е. Доколку не сакаат да играат, тоа е подобро за мене. Мотивиран сум и сакам да имам добра сезона идната година. Доколку има тенисери кои не сакаат да се вакцинираат нека си останат во Европа, тоа не е мој проблем – изјави Пер.

Бранителот на трофејот, Новак Ѓоковиќ, но и победникот на УС Опен, Данил Медведев, сè уште не откриваат дали се вакцинирани или не, и најавија дека конечната одлука за тоа дали ќе настапат во Мелбурн ќе ја донесат откако ќе бидат познати условите за настап. Моментно траат преговори помеѓу федералната влада и владата на сојузната држава Викторија за тоа да се дозволи настап на Австралија Опен и на невакцинирани тенисери и тенисерки под услов да бидат две недели во строг карантин.