Температури над 15°C во овој дел од годината се „крајно чудни“, велат научниците, додека снегот се топи, а дожд паѓа врз ледниците во вообичаено замрзнатиот регион. Температурите на Антарктикот се искачија над 15°C овој месец, уривајќи го претходниот зимски топлински рекорд за овој инаку замрзнат регион и предизвикувајќи сериозна загриженост кај научниците за брзината со која се случува климатскиот колапс, пишува „Гардијан“.

Новиот зимски температурен пик беше регистриран од аргентинската база „Есперанца“ на полуостровот Тринити на 6 јуни, во ек на долготраен топлински бран, каде што максималната дневна температура ја надминуваше нулата цели три недели по ред.

Научниците истакнуваат дека измерените 15,4°C го соборија претходниот рекорд поставен на истата станица во 1998 година за дури 2°C.

„Ова е апсолутно лудо. Ова е исто така за околу 20°C над нормалата за овој период од годината. Станува збор за огромна аномалија“, изјави Раул Кордеро, еквадорски професор по климатологија на Универзитетот во Гронинген.

Невообичаено силни топли ветрови од север дувале низ поголемиот дел од Антарктичкиот Полуостров. Една чилеанска метеоролошка станица, „Бунен Ривера“, исто така регистрирала температури близу 13°C.

Пејзажот го менува ликот: Од бел во кафеав и зелен

На островот Крал Џорџ, лоциран на околу 160 километри од базата „Есперанца“, истражувачите известија дека пејзажот речиси целосно го променил изгледот – од доминантно бел, тој станал кафеав, сив и зелен откако температурите таму достигнаа 4,6°C на 6 јуни.

„Минатиот викенд беше многу чуден. Температурите овде отидоа премногу високо, па сè што беше надвор се стопи. Вообичаено во ова време на земјата има околу 20 сантиметри снег и многу мраз“, изјави Луис Муњос, чилеански глациолог.

Муњос раскажува дека тој и неговата колешка Наталија Местре минатата среда се искачиле на врвот на блискиот ледник Колинс на 500 метри надморска височина и биле шокирани кога виделе како дожд го топи мразот.

„Тоа има директно влијание врз глечер, кој токму сега би требало да прима нов снег. Не би смеело да дојде до топење во овој период од годината. Ова очигледно не е добро за глечерот“, предупредува тој.

Приближување до точката од која нема враќање

Антарктичкиот регион е под сè поголем човечки притисок, директно преку експлоатација на ресурсите и туризмот, а индиректно преку согорувањето на фосилните горива што ја загрева планетата.

Научниците предупредуваат дека некои од најголемите ледници во регионот, како што се ледниците Туајтс (Thwaites) и Пајн Ајленд (Pine Island), се приближуваат или можеби веќе ја поминале точката од која нема враќање. Нивното целосно топење би можело да го подигне глобалното ниво на морињата за дури четири метри. Дополнително, откриено е дека топењето на антарктичкиот мраз ја забавува глобалната циркулација на океанските струи.

Професорот Кордеро појаснува дека еден единствен зимски топлински бран, колку и да е фрапантен, сам по себе нема да направи огромна разлика во нивото на морињата, но тој е сериозен показател за алармантните долгорочни трендови.

„Овој топлински бран се случи поради екстремно силните западни ветрови. Нивната зачестеност постојано расте уште од 80-тите, а добро е познато дека тоа е директно поврзано со климатските промени“, заклучува Кордеро.