Неколку години ќе бидат потребни за да се создаде колективен имунитет на коронавирусот во Словенија. Тоа го изјави денеска Алеш Розман, директор на клиниката Голник, една од четирите болници во Словенија што примаат заразени со Ковид-19.

– Ќе бидат потребни неколку години со цел да се создаде колективен имунитет за сите со ова темпо, рече докторот.

Говорејќи на прес-конференција, докторот истакна дека Словенија може да се смета за една од најуспешните држави во борбата против вирусот, но дека по епидемијата би било неопходно да се одржи социјалната дистанца и да се откаже од честото дружење на кафе, затоа што ќе трае долго додека целото население не стекне имунитет.

Според податоците на Министерството за здравство на Словенија, изминатото деноноќие се направи нови 1.232 тестирања, со кои се потврдени 28 случаи на новозаразени со коронавирусот. Ова претставува намалување на бројот на инфицирани во споредба со минатите денови.

Во овој момент поради Ковид-19 хоспитализирани се 94 лица, а на одделенијата за интензивно лекување се наоѓаат 37 пациенти.

Во изминатите 24 часа, од болница се отпуштени 11 пациенти, а пет починале како последица од Ковид-19.