Се верува дека илјадници луѓе ги загубиле своите заштеди откако инвестирале во апликација за тргување со криптовалути наречена „јЕарн Бот“, а експертите кои ја истражувале компанијата велат дека случајот може да биде еден од најголемите крипто скандали досега.

Тргувањето со криптовалути стана популарно затоа што на луѓето често им се ветуваат големи профити за краткорочни инвестиции, но агенциите за спроведување на законот предупредуваат на се поголем број измами и им препорачуваат на инвеститорите да бидат претпазливи, се наведува во извештајот на „Би-би-си“.

Во Романија, десетици личности од висок профил, вклучително и владини претставници и академици, беа убедени да инвестираат преку апликацијата бидејќи беше спонзорирана од Габриел Гараис, водечки ИТ експерт во земјата, но Гараис тврди дека и тој бил измамен да ги инвестира своите заштеди во апликацијата по што изгубил пари, пренесува Танјуг.

Човекот именуван од страна на веб-страницата „јЕарн Бот“ како основач на компанијата, изјави за британскиот јавен сервис дека никогаш не слушнал за компанијата и потврди дека поднел пријава во полиција. Технолошкиот институт во Масачусетс, заедно со компаниите како Хуавеј и Куалком, се именувани како „стратешки партнери“ на јЕарн Бот, но и тие тврдат дека немаат познавање на компанијата и не работат со неа.