Според експертите од Меѓународната асоцијација на консултанти за однесување на животни (IAABC), квалитетниот сон е клучниот темел за доброто однесување и здравјето на кучињата. Нашите крзнени пријатели, исто како и луѓето, имаат потешкотии со спиењето доколку имале стресен ден.

Истражувачите набљудувале 16 кучиња по два типа искуства, позитивни (игра и галење) и негативни (кратка разделба од сопственикот или присилно задржување). По тричасовен одмор, резултатите покажале дека кучињата кои биле под стрес имале значително полош квалитет на сонот.

Интересно е што стресните ситуации ги терале кучињата побрзо да заспијат , реакција која науката ја поврзува со „спиење предизвикано од стрес“. Сепак, иако заспивале веднаш, тие поминувале повеќе време во РЕМ фазата (фаза на сонување), имале немирен сон и се буделе многу порано од вообичаено.

Оваа студија е важен потсетник за сопствениците дека емоционалната состојба на кучето директно влијае на неговото здравје и одмор, исто како што е случајот и кај луѓето.