Актуелниот светски вицешампион Хрватска ќе биде дел од групата Ф на претстојното Светско првенство што од 21 ноември до 18 декември ќе се одржи во Катар, а селекторот Златко Далиќ е задоволен од противниците.

„Коцкестите“ во групата Ф се заедно со Белгија, Мароко и Канада. Првиот натпревар Хрватска ќе го игра против Мароко, по што ќе следи дуелот со Канада, а во последното коло од групната фаза е дерби пресметката со Белгија.

– Добро поминавме на ждрепката иако не очекувавме да биде лесно. Ова е Светско првенство. Канада одигра одлично во квалификациите, потоа тука е Мароко и селекторот Халилхоџиќ кој е добар селектор и на крај ја имаме Белгија – вели селекторот Далиќ.

На ждрепката му се исполни и единствената желба на Далиќ, а тоа е да го избегне актуелниот светски шампион во групната фаза.

– Единствена желба ми беше да ја избегнеме Франција. Но, најважно за мене и сите фудбалери да бидат здрави бидејќи така може да го оствариме тоа што го сакаме – додава Далиќ.