ГРК Охрид: Стоилевски, Ѓорѓески, Ојлески и Кукоски се новите „Гладијатори“
Нови промени во ракометниот клуб Охрид кој ангажираше четворица македонски репрезентативци: Даниел Ѓорѓески, Гоце Ојлески, Никола Стоилевски и Милорад Кукоски.
Клубот воедно ја информираше јавноста дека пет ракометари нема да го носат „сино-белиот“ дрес од сезоната, тие се Александар Миленковиќ, Зураби Цинцадзе, Виктор Василевски, Балша Цејовиќ и Хазеин Рустамов.
Ѓорѓески е големо голманско засилување за ГРК Охрид, 29 годишниот гостиварчанец следната сезона ќе го носи „сино-белиот“ дрес. Доаѓа во тимот на „Гладијаторите“ по одличните игри за унгарскиот тим Будакалас, а пред тоа играше и за Металург, Вардар и Пелистер каде што во овие тимови имаше настапи во европските купови и регионалната СЕХА Лига.
– Среќен сум што се враќам назад во Македонија и посебна чест ми е што ќе бидам дел од ваков одличен проект и тим како што е Охрид. Охрид е сериозна екипа со големи амбиции, а јас се надевам дека оваа сезона ќе ги исполниме сите цели и сите заедно ќе се радуваме на многу победи – изјави Ѓорѓески.
Ојлески, 33-годишното репрезентативно лево крило доаѓа од шампионот на Македонија, Еурофарм Пелистер, а претходно го носеше и дресот на Вардар, Металург, и на романскиот Одорхеи.
– Драго ми е што ќе сум дел од ракометниот клуб Охрид, клуб кој што покажува сериозност и квалитет во македонскиот ракомет. Се надевам следната сезона ќе ни биде успешна и ќе славиме многу победи – рече Ојлески.
Десното крило Стоилевски (24) блескаше за Еурофарм Пелистер 2 во плеј-оф натпреварувањето. Пред тоа настапуваше за екипите на Еурофарм Пелистер, Металург и Бутел Скопје.
– Драго ми е што ќе бидам дел од екипа која има одлични планови и цели за во иднина кои би ми помогнале многу да напредувам како играч – вели Стоилевски.
И најдобриот специјалист за одбрана во ракометна Македонијa станува „Гладијатор“. Кукоски (35) доаѓа од Еурофарм Пелистер, а пред тоа играше и за Металург, Зомимак и Вардар.
– Мило ми е што доаѓам во клуб со европски амбиции, кој расте од година во година. Сигурен сум дека ќе ги оправдаме очекувањата на управата и публиката – се зборовите на Кукоски.