Ѓорѓиевски: Трговците имаат огромни маржи, а производителите одвај преживуваат
Претседателот на Агрокомората при Сојузот на стопански комори, Горан Ѓорѓиевски кој е и сопственик на компанијата за пекарски производи и слатки „Специјал“, вели дека е добро што конечно Владата видела дека проблемот со високите цени е кај трговците, ограничувајќи ги маржите, но дека производителите повторно се маргинализирани.
– Да, маржите се ограничија, но за кого? За трговците на големо и на мало. Повторно производителите се изоствени со мерки. Ограничувањето на маржата до 5 проценти на продажната цена во трговијата на големо и до 10 проценти во трговијата на мало ја откри вистината колкави се маржите во трговијата. Големите трговски ланци имаат маржи од 20, 25, па и 30 проценти. Производителите пак, имаат маржа од одвај 2-3 проценти. Затоа, ако се погледаат финансиските извештаи на трговските синџири тие имаат огромен раст и приходи, а ние производителите одвај преживуваме – изјави за „Слободен печат“, Ѓорѓиевски.
Тој вели дека сепак се надева оти работите ќе се средат.
– Министерот за економија најави закон за нефер трговски практики. Го очекуваме тој закон и се надеваме дека со него многу работи ќе се регулираат – рече Ѓорѓиевски.
Владата вчера информираше дека се определува највисоката трговска маржа како посебен услов во трговијата со следните производи: леб, шеќер, сол, брашно – тип 400, сурово сончогледово масло и сончогледово масло за јадење; трајно млеко со масленост од 2,8%, 3,2% и 3,5%; свежо месо и сувомеснати производи, сирење и урда, ориз, јајца, тестенини, пченица, овошје и зеленчук.
Оваа одлука ќе се применува од 1 март 2022 година до 31 мај 2022 година.