Познатиот инвеститор Ворен Бафет процени дека е сè потешко да се најдат квалитетни можности за инвестирање на денешниот берзански пазар, бидејќи сè повеќе учесници се фокусирани на шпекулативно тргување наместо на долгорочни инвестиции.

-Тешко е да се најдат потценети компании кога сите претпочитаат да се коцкаат – рече Бафет во интервју за CNBC.

Американскиот инвеститор, кој има 95 години и со децении се залага за стратегијата на инвестирање во потценети компании, рече дека вистинските инвестициски можности се појавуваат ретко и бараат големо трпение.

– Има периоди кога можностите ви се нудат толку брзо што е речиси неверојатно. И има периоди кога имате голема среќа ако најдете една добра инвестиција за неколку години. Втората треба да биде вообичаена состојба – рече Бафет.

Според него, индустријата може да заработи повеќе пари охрабрувајќи ги луѓето да се однесуваат како коцкари, кои купуваат и продаваат цело време, наместо инвеститори, кои тргуваат ретко и ги држат своите позиции на долг рок. Бафет ја критикуваше состојбата на финансиските пазари и претходно. Во мај, тој ја спореди берзата со „црква со казино“, укажувајќи на брзиот раст на тргувањето со еднодневни опции (ODTE), што го смета за форма на коцкање, а не за инвестирање.

Американскиот пазар на акции достигна рекордни нивоа оваа година и покрај геополитичките ризици, но некои аналитичари предупредуваат дека акциите поврзани со развојот на вештачката интелигенција достигнаа превисоки вредности. Во исто време, експертите укажуваат на растот на шпекулативните инвестиции преку опции и високоризични ETF фондови, кои ги зголемуваат добивките и загубите со помош на позајмени пари.

Клучната поента е дека овие фондови се дизајнирани да ги следат дневните, а не долгорочните движења на индексите, па затоа според Бафет тие се повеќе како казина отколку берзи.

Што подготвува наследникот на Ворен Бафет? Прв пат им се обрати на акционерите