Најдобрата македонска тенисерка Лина Ѓорческа почна со победа на ИТФ 50 турнирот во Порто, Португалија што се игра за награден фонд од 40.000 долари.

Ѓорческа во првиот меч од турнирот „главен костур“ ја победи Швајцарката Илена Ин-Албон со 2:0 во сетови (6:2, 6:3) за 76 минути игра.

Во првиот сет нашата тенисерка направи два брејка во шестиот и во осмиот гем и првиот сет го доби со 6:2 во гемови.

Вториот сет имаше поинаков тек, а тенисерката од Швајцарија направи брејк во третиот гем и поведе со 2:1, но Ѓорческа потоа имаше серија од четири освоени гема за водство од 5:2 и сетот го доби со 6:3.

Во следното коло противничка на Ѓорческа ќе биде Германката Настасја Шунк, која со 6:2 и 6:1 ја совлада Португалката Миља Секуеира. Мечот ќе се игра во четврток.