Најдобрата македонска тенисерка Лина Ѓорческа го заврши настапот на челинџер турнирот во Порто во осминафиналната рунда, откако денеска беше поразена од Турчинката Ајла Аксу со 2-0 во сетови.

Мечот траеше еден час и 42 минути, а најизедначена и највозбудлива борба беше видена во првиот сет. Ѓорческа одлично го отвори натпреварот и прва стигна до брејк за водство од 2-1, но Аксу брзо возврати и ја анулираше предноста. Македонската тенисерка повторно направи брејк во завршницата и поведе со 5-4, но токму тогаш турската тенисерка ја презеде иницијативата и со два последователни брејка го сврте сетот во своја корист, освојувајќи го со 7-5.

Во вториот сет Аксу имаше целосна контрола над случувањата на теренот. Со два рани брејка таа брзо создаде сигурна предност и без поголеми проблеми го затвори сетот со 6-2, со што ја обезбеди победата и пласманот во четвртфиналето.