Германецот му верува на Михајловски: Дисингер верен на Вардар!
Стојанче Стоилов, Тимур Дибиров и Иван Чупиќ исто така не го напуштаат клубот, вели бекот на „црвено-црните“.
Во интервјуто за „Менхајмер Морген“ Кристиан Дисингер потврди дека ќе остане уште една сезона во редовите на РК Вардар.
28-годишниот германски бек се договори со неговиот менаџер Марк Рапарлие и новиот претседател на клубот, Михајло Михајловски да остане во Скопје и покрај финансиските проблеми.
– Новиот претседател Михајловски нè увери дека ќе ги добиваме нашите пари секој месец. И немам причина да се сомневам во тоа, бидејќи имам многу добар впечаток за новиот почеток. Јас не сум единствениот играч што мисли така. Стојанче Стоилов, Тимур Дибиров и Иван Чупиќ исто така не го напуштаат клубот. Сите ние сакаме да му дадеме на овој „проект“ шанса и веруваме дека можеме да изградиме нешто заедно со неколку нови млади играчи – рече Дисингер.
Можно беше летово да се врати во Бундеслигата, но желбата постоеше пред да се појави коронавирусот.
– Го немав чувството дека сакав да одам таму. Искрено, во многу клубови финансиската ситуација не е сигурна, и тешко може некој нешто да ви гарантира. Тука во Скопје им верувам на новите луѓе и беше јасно, доколку нештата одат солидно и амбициите се вистинките, сакам да останам во Вардар. Имам сè што ми е потребно, убав е градот – додаде Германецот.