На Железничката станица во Скопје викендов започна специјалната новогодишна театарска претстава за деца „Дедо Мраз дојде со воз“, која ќе трае до 30 декември.

Претставата е во организација на Училиштето за театар „Од игра до претстава“, Македонски железници – Инфраструктура и Македонски железници АД Транспорт.

Публиката има можност да го следи волшебното доаѓање на Дедо Мраз од Лапонија со неговиот магичен воз, преку интерактивна приказна која се одвива на повеќе локации: музејската поставка на Македонски железници, театарска претстава во салон и посета на волшебниот воз, каде секое дете ќе добие подарок од Дедо Мраз.

Годинава во соработка со МЖ Транспорт е вклучен и легендарниот реставриран воз „Шпанец“, со кој посетителите ќе можат да патуваат низ Скопје и да другаруваат со ликовите од претставата. Приказната ги следи патешествијата и предизвиците со кои се соочува Дедо Мраз пред да пристигне во Скопје, при што му е потребна помош од неговите елени, џуџиња, Снешко, но најмногу од децата.

Автор и продуцент на проектот е Миодраг Костиќ, текстот и режијата се на Игор Ивковиќ, а реставрацијата и музејската изложба се дело на Ванчо Милошевски. Во претставата настапуваат актерите Дарко Вељиќ, Андреј Серафимовски, Тодор Стојковски, Симона Петрушева, Ведра Димова и Александар Спироски, заедно со околу 40 ученици од училиштето „Од игра до претстава“.