Во Истра е уапсен 63-годишен словачки државјанин под сомнение дека со очила со вградена камера тајно снимал голи деца, објави хрватски „Индекс“.

Мажот бил приведен откако во туристички објект го забележал стражар, а полицијата кај него пронашла компромитирачки материјал.

Инцидентот се случил на 2 јули околу 16:30 часот, кога вработен во компанија за обезбедување во туристички објект на подрачјето на Истра го забележал Словакот како тајно снима деца.

Го задржал до доаѓањето на полицијата, која спровела криминалистичка истрага и кај 63-годишникот пронашла материјал што го товари за кривично дело искористување деца за порнографија.

Полицијата објави фотографија од очилата.

По завршувањето на истрагата, осомничениот на 3 јули во попладневните часови, со кривична пријава, бил предаден во притворската единица на Полициската управа на Истра.

Од полицијата порачаа дека ваквите криминалистички истраги покажуваат оти јавноста е сè посвесна за проблемот со снимање деца и дека граѓаните сè почесто препознаваат сомнително однесување, што овозможува навремена реакција и приведување на сторителите.

Тие упатија апел до родителите да внимаваат на своите деца, да следат каде се наоѓаат и што прават на плажа, како и да им облекуваат костими за капење.

Полицијата ги замоли граѓаните доколку забележат сомнителен човек што снима деца, веднаш да ја известат полицијата.

Воспитувач од Србија осуден на 20 години затвор — фотографирал голи деца во градинка