Обвинителството во округот Марикопа во Аризона го истражува случајот со 18-месечниот Винсент Лоренцо Фјордилино, кој речиси се удавил во семејниот базен, а потоа во болница бил погрешно прогласен за мртов. Детето преживеало и во меѓувреме било пуштено од болница, соопшти полицијата во Гилберт.

Сепак, полицијата му препорачала на обвинителството да покрене обвинение за злоупотреба на дете против неговите родители. Според полициски извештај до кој дошле американски медиуми, родителите можеби не забележале дека момчето излегло и стигнало до базенот додека гледале натпревар бидејќи постои сомнеж дека нивната состојба на свест била нарушена од марихуана или од други супстанции.

Во извештајот се наведува дека двајцата признале оти пушеле марихуана утрото кога се случил инцидентот.

Случајот почнал на 8 февруари околу 17:38 часот, кога било повикано 911 откако момчето било пронајдено како плови со лицето надолу во базенот.

Роднина се обидел да го реанимира со кардиопулмонална реанимација, по што детето било пренесено во ургентниот центар на болницата „Мерси Гилберт медикал центар“.

Таму лекарски тим, во кој бил и докторот А. Туси, се обидувал да го спаси детето. Според полицискиот извештај, околу 18:20 часот лекарот го прогласил времето на смртта и побарал момент на молчење.

Но, родителите и полицајците што биле во просторијата изјавиле дека детето и по прогласувањето на смртта изгледало како да зема воздух.

Еден детектив подоцна пријавил дека слушнал уште едно јасно вдишување додека болничкиот персонал се подготвувал да го префрли момчето во „ладната соба“, односно просторијата што се користи како мртовечница. Медицинска сестра објаснила дека станува збор за агонално дишење, кое може да се појави по реанимација, кислород и притисок врз телото.

Вратата од ладната соба била затворена околу 19:23 часот. Повеќе од четири часа подоцна, кога пристигнал тимот на судска медицина за да го преземе телото, било утврдено дека детето дише. Семејството веднаш било известено, а Винсент бил пренесен со хеликоптер во Детската болница во Феникс.

Болницата соопшти дека спровела внатрешна истрага, но не ги објави резултатите. Адвокатот на лекарот наведе дека во случајот има многу повеќе факти и медицински околности одошто досега било објавено.