Претседателот Доналд Трамп ги повика Американците да ги заштитат слободите што основачите на нацијата ги замислиле пред 250 години од она што тој го претставува како „комунистичка“ закана од прогресивните демократи. Тој говореше во пресрет на Денот на независноста, кај планината Рашмор, објави „Ројтерс“.

— Стоиме под споменикот на овие херои, навистина неверојатна група луѓе, и повторно се посветуваме на тоа да бидеме нација која е голема, смела, благородна и величествена како овие американски гиганти. А тоа не е лесно, но ќе го направиме. Во нашата земја сега има оживување на комунистичката закана, вклучително и од новодојденци кои прифаќаат идеи целосно спротивни на нашиот начин на живот и на нашиот голем успех — рече Трамп кај гранитната планина во Јужна Дакота, каде што се врежани главите на четворица американски претседатели.

Трамп веќе една недела изнесува слични пораки за подемот на демократските социјалисти, но вчера го даде својот најостар и најдолг аргумент на таа тема. Тоа доаѓа во време кога Американците се соочуваат со упорна инфлација и високи цени на горивото од почетокот на американско-израелската војна со Иран.

Републиканските законодавци, сè позагрижени дека конфликтот би можел да ја чини партијата контрола врз барем еден дом на Конгресот на изборите во ноември, се фатија за неодамнешната низа успеси на левичарски демократски кандидати.

Семејството Трамп заработило 2,3 милијарди долари од криптовалути, инвеститорите изгубиле сè

Трамп рече дека заканата доаѓа и од „новодојденци во нашата земја“, поврзувајќи ја својата антикомунистичка реторика со антиимигрантската тема што ја поттикна неговата изборна победа и која историски била дел од критиките кон комунизмот во САД. Во еден момент, Трамп рече дека новодојденците треба да бидат протерани.

— Решени сме и се колнеме, за сите да чујат, дека граѓаните на Соединетите Американски Држави брзо ќе го поразат комунизмот… Брзо ќе ги испратиме оттука и ќе продолжиме да ја градиме нашата земја поголема и подобра, посилна од кога било. Америка никогаш нема да биде комунистичка земја! — рече Трамп.

Потоа тој премина на прашањето што беше во фокусот.

— Можеме да ги изгубиме изборите за Конгресот само ако си дозволиме да ги изгубиме — рече американскиот претседател.

Четворица прогресивни кандидати, меѓу кои тројца демократски социјалисти, минатата недела победија на конкурентни демократски предизбори во Њујорк, а во вторникот и во Колорадо. Прогресивни кандидати победија и во изборни трки во Кентаки, Њу Џерси, Охајо, Пенсилванија и Тексас.

Минатата недела Трамп ги нарече нивните победи „најголема закана за нашата земја од нејзиното основање“.

Соединетите Американски Држави денеска го одбележуваат Денот на независноста – 4 јули, национален празник кој годинава има посебно значење бидејќи се слават 250 години од прогласувањето на американската независност.

На 4 јули 1776 година, 13-те британски колонии во Северна Америка ја усвоија Декларацијата за независност, со што беше означен почетокот на создавањето на САД како самостојна држава.

Подоцна, во 1787 година, беше донесен американскиот Устав, документ со кој беа поставени основите на државното уредување и системот на поделба на власта на извршна, законодавна и судска.

И годинава, празникот се одбележува низ целата земја со паради, концерти, културни настани и семејни собири. Во вечерните часови традиционално ќе се одржат големи огномети во повеќе американски градови, како еден од најпрепознатливите симболи на Денот на независноста.

Трамп денеска требаше да се обрати пред толпа луѓе на Националниот мол, пред голем огномет, додека жесток топлотен бран ги наруши прославите за Четврти јули во голем дел од земјата.

Трамп не мора да ги враќа отстранетите експонати за ропството, одлучи американски суд