Семејството на американскиот претседател Доналд Трамп заработило најмалку 2,3 милијарди долари од криптопроекти што ги промовираше по изборите во 2024 година, додека, пак, повеќе од милион инвеститори објавија нето загуби од приближно ист износ, покажува истрагата на „Ројтерс“.

„Ројтерс“ анализираше корпоративни документи, онлајн објави и јавни изјави од семејството на Трамп и менаџерите на проекти и разговараше со лидери во криптоиндустријата. Нивните наоди беа разгледани од повеќе од десетина сметководствени и криптоексперти, кои ги оценија проценките како разумни.

Во центарот на истрагата се четири проекти: World Liberty Financial, мем-монетата $Trump, American Bitcoin и AI Financial Corp, компанија која до април се викаше ALT5 Sigma. Иако проектите се разликуваат по структура, „Ројтерс“ наведува дека сите тие го следеле истиот модел: Трампови инвестирале малку или воопшто не инвестирале свои пари, ги промовирале проектите со своето име и политичка видливост, а потоа заработувале пари бидејќи малите инвеститори купувале имоти чија вредност подоцна нагло паднала.

Белата куќа не ги коментираше директно наодите на „Ројтерс“.

„Сите дејствија преземени од претседателот Трамп и неговата администрација се во најдобар интерес на американскиот народ“ изјави портпаролката Ана Кели. Ерик Трамп и Доналд Трамп помладиот не одговорија на барањата за коментар.

Инвестирала 2000 долари, остануваат помалку од 120 долари

Една од инвеститорите е 29-годишната Фатима Елгдави, инженер за софтверски проекти од Санта Барбара. Во јануари 2025 година, додека Трамп се подготвуваше да се врати во Белата куќа, пријателка ѝ ја покажала неговата онлајн порака со која промовираше нова криптовалута: „Земете го вашиот $Tрамп сега“.

Елгдави мислела дека е безбедна инвестиција.

„Ако Трамп стои зад тоа, тоа мора да биде легитимна инвестиција“, се присети таа.

Инвестирала 2000 долари од своите заштеди во мем-монетата $Tрамп. На крајот на мај, нејзината инвестиција вредела помалку од 120 долари.

Мем-монетите се многу шпекулативни криптотокени чија вредност често зависи од популарноста на социјалните мрежи, а не од реалната деловна активност. „Ројтерс“ објави дека $Tрамп изгубил 97% од својата вредност од својот врв во јануари 2025 година.

Елгдави денес вели дека ѝ е јасно дека „нема повеќе надеж“ за нејзината инвестиција. Таа верува дека станува збор за шема „пумпање и исфрлање“, но додава дека се чувствува среќна во споредба со луѓето кои изгубиле многу поголеми суми.

Многумина верувале во името на Трамп

„Ројтерс“ разговарал со 27 индивидуални инвеститори. Речиси сите знаеле за претходните банкроти и неуспешни деловни потфати на Трамп, но верувале дека неговото име, политичка позиција и углед како бизнисмен ќе им донесат профит. Многумина признале дека направиле малку или воопшто не направиле длабинска анализа пред да инвестираат.

Софтверски инженер од Минесота изгубил 60.000 долари заштеда. Менаџер на хотел од Виетнам изгубил години заработка. Мет, 45-годишен машиноградител од Индијана, инвестирал 40.000 долари во акции на АЛТ5 Сигма. Вредноста на неговите акции паднала за 79%, или околу 32.700 долари.