„Згрозени сме од тоа што се случи“; „Не си ја препознаваме населбата“; „Треба да дојдете да снимате навечер за време на викенд, да видите што e овде“, велат дел од анкетираните жители на Аеродром пред камерата на „Слободен печат“.

Според повозрасните, проблемот со врсничкото насилство е модерен проблем.

– Во наше време немаше булинг, ние се сакавме, се дружевме, си игравме во вечерните часови, не се тепавме. Овие нови генерации се невоспитани – вели една госпоѓа.

Сведочеле на многу страшни сцени, како што споделија со нас.

– Петок и сабота овде е лудило. Од други места на Скопје, најчесто Синѓелиќ, Илинден, доаѓаат огромни групи деца, дел од нив се и вооружени со ножеви, палки. Многу често пријавуваме, се жалиме, апелираме, но ова не се решава веќе подолго време. Навистина буквално молиме за помош. Во ФБ-групата „Пријави проблем“ веќе врие – раскажува една помлада жителка.

Често пријавувањето во полиција, како што вели таа, било безуспешно.

– Или има недостаток на полиција или не знам во што е проблемот. Кога сакаме да пријавиме инцидент или не ни креваат на телефон, или ќе нè откачат како да е нешто неважно или доаѓаат кога веќе е доцна – вели таа.

Младите не се зачудени, велат дека ова е веќе секојдневие за нивните генерации.

– Проблемот го гледам во системот. Многу пати сум бил сведок на булинг. Сум се обидел да помогнам каде што може, но ако се поголема група, се повлекувам – вели едно момче.

Родителите и институциите се клучна алка за проблемот, сметаат анкетираните.

– Најголемиот проблем го гледам во родителите, не им посветуваат доволно време на децата. Мора да се запрашаме каде скршнавме. Ќе го посочам прстот и во образованието. Наставниците да поработат повеќе на педагошкиот дел со децата. Потребна е коренита измена на едукацијата за превенција околу врсничкото насилство – вели една мајка.

Погледнете ја анкетата на јутјуб-каналот на „Слободен печат“.

ВОЗНЕМИРУВАЧКО ВИДЕО од брутално насилство врз девојче во Аеродром: ја влечат за коса, ја тепаат — десетици деца навиваат и снимаат

АУДИО: Мајката на 14-годишникот крвнички избоден со нож во Ченто, тврди дека полицијата го води случајот како „насилство“ а не како обид за убиство