Азески: Го имам прошетано цел Балкан и сè уште гледам луѓе кои не разбираат колку е важно заеднички да работиме
Економскиот развој е невозможен без отворање на границите, решителна борба против корупцијата и сивата економија, забрзана гасификација и поддршка на извозот и стабилна правна рамка – рече претседателот на Стопанската комора, Бранко Азески на форумот организиран од Стопанската комора. Азески порача дека регионот мора да ја засили меѓусебната соработка и да ги прифати европските вредности.
Препорачано
-Го имам прошетано целиот Балкан. Нема метар квадратен каде што не сум бил. Наместо вистинска соработка, сè уште гледам луѓе кои не разбираат колку е важно заеднички да работиме. Ова е јасна порака дека мора да градиме цврсти темели дома, а потоа тие вредности да ги шириме и во регионот- истакна Азески.
Тој потенцираше дека во време на кризи, улогата на стопанските комори е да им помогнат на компаниите да ја препознаат поврзаноста меѓу одржливоста и конкурентноста.
Азески уште еднаш нагласи дека бизнисот инсистира на отворање на границите и ја поздрави соработката со Владата во насока на подобрување на економските врски со клучните трговски партнери.
-Во последните шест месеци заеднички настапуваме на странските пазари и очекуваме тој пристап да продолжи и во иднина- рече тој.
Според него, Македонија во изминатите години поставила солидни основи за справување со големите предизвици, но останува уште многу работа.
-Не смееме да се откажеме од борбата против корупцијата и сивата економија, од брзата гасификација, поддршката на извозот и континуитетот на правните прописи. Тоа се темелите врз кои ќе се гради идниот развој на државата – нагласи Азески.
Тој оцени дека земјата покажала отпорност, успешно справувајќи се со енергетската, финансиската и здравствената криза, како и со безбедносните предизвици во регионот.
-Сега нема враќање назад. Продолжуваме напред и ги повикуваме МАНУ, универзитетите и невладиниот сектор да се приклучат во креирањето политики што ќе бидат во интерес на компаниите, граѓаните и државата-порача Азески.
На форумот се обратија и премиерот Христијан Мицкоски, министерот за надворешни работи Тимчо Муцунски и евроамбасадорот Михалис Рокас.
Пакистанци и Бангладешани ќе ни готват и ќе ни градат куќи — бизнисот бара спас во увоз на работници
