Паника не е потребна, но внимателност – да. Туристите кои летуваат во северниот дел на Грција деновиве сè почесто наидуваат на предупредувања за таканаречената „риба змеј“, морски вид чиј убод може да биде многу болен ако случајно се нагази во плитка вода, пишува Никана.

На социјалните мрежи се споделуваат објави од туристи кои тврдат дека ја забележале оваа риба на плажата Амолофи, во близина на Кавала. Слични предупредувања има и за други песочни плажи во северниот дел на Егејското Море, особено во регионот на Кавала, на Тасос и на Халкидики.

@fishingexperiences Δρακαινα ψαρι #δρακαινα #ψαρι #ψαρια #ψαρεμα #voukelatosfishingexperiences #Greece ♬ Paradise – Tony Dark Eyes

Иако името звучи застрашувачки, станува збор за риба која одамна е присутна во Средоземното Море. Таа не е нов инвазивен вид, ниту пак се појавила одеднаш во грчките води.

Рибата змеј, позната и како дракена, припаѓа на семејството трахиниди. Најчесто е долга од 10 до 15 сантиметри, има песочна боја и поради тоа тешко се забележува на морското дно.

Најчесто се закопува во песокот, при што надвор ги остава само очите и отровните боцки на грбот. Токму затоа капачите може да ја нагазат без воопшто да ја видат.

Дракената не ги напаѓа луѓето и не е агресивна. Отровните боцки ги користи за одбрана, а до убод најчесто доаѓа кога некој случајно ќе стапне врз неа.

Убодот предизвикува силна, остра болка, која обично се засилува во првите триесетина минути. Кај почувствителни лица може да се појават и потење, мачнина, вртоглавица или чувство на слабост. Смртните случаи се исклучително ретки.

Важно е да се направи разлика меѓу дракената и рибата зајак, која последниве години се шири во источниот дел на Средоземното Море. За разлика од неа, рибата змеј е автохтон вид и со векови живее во Средоземното, Егејското и Јадранското Море.

Опасната риба зајак напаѓа во Грција и на Јадран — грчкиот Црвен крст советува што да направите ако ве касне

Во Грција, оваа риба им е добро позната на рибарите. Тие ја ловат и ја користат за исхрана, но претходно внимателно ги отстрануваат отровните боцки.

Локалните туристички портали наведуваат дека дракената може да се сретне речиси на сите песочни плажи во Грција. Почесто се забележува во плитко и мирно море, на песочно дно, каде што лесно се закопува и останува незабележлива.

На туристите им се препорачува да не се откажуваат од капење, туку да бидат повнимателни при влегување во вода. Најдобра заштита се обувки за вода, особено на плажи со песочно дно.

Се советува и во плиткото да не се гази со крупни чекори, туку стапалата полека да се придвижуваат низ песокот. Така рибата најчесто се повлекува пред да дојде до контакт.

Ако сепак дојде до убод, лекарите препорачуваат погоденото место што поскоро да се стави во топла вода, толку топла колку што може да се издржи без да се предизвика изгореница. Отровот е чувствителен на висока температура, па топлината може значително да ја намали болката.

По првата помош, се препорачува лекарски преглед, особено ако болката е силна, ако симптомите се влошуваат или ако се појави алергиска реакција.

Грчките туристички служби потсетуваат дека, и покрај предупредувањата, убодите од дракена се релативно ретки во споредба со огромниот број капачи што секое лето ги посетуваат грчките плажи.

Затоа, појавата на оваа риба не треба да предизвика страв меѓу туристите. Таа е само уште еден потсетник дека и на море треба да се внимава, особено кога се влегува во плитка вода на песочни плажи.

Крвава сцена на плажа во Грција, риба зајак каснала жена за ногата