Меѓународна полициска операција идентификуваше десетици сторители кои ги дрогирале и силувале своите партнерки, користејќи онлајн групи за разговор за да ги олеснат и поттикнуваат своите напади, објави Си-ен-ен.

Во повеќето случаи, жртвите се жени кои биле успивани со седативи пред да бидат силувани и сексуално нападнати, соопштија „Европол“ и британската Национална агенција за криминал (НЦА).

Онлајн групите им овозможувале засолниште на претежно машки сторители за да координираат напади, да разменуваат информации, како и да објавуваат видеа и фотографии од злоупотребата.

Германските и британските криминалистички агенции, со помош на органите за спроведување на законот од САД, Бразил, Канада, Франција, Унгарија, Холандија и од Шпанија, започнале заедничка операција за справување со „еволуирачката закана“, соопшти НЦА.

Често жртвите воопшто не знаат дека биле сексуално нападнати сè додека не бидат контактирани од полицијата, а злоупотребата ја извршува „некој што го познаваат и кому му веруваат, а во некои случаи и повеќе поврзани сторители“, наведува агенцијата.

Истрагите доаѓаат по тајна истрага на Си-ен-ен за онлајн мрежи на мажи кои ги учат другите како да ги дрогираат и силуваат своите партнерки.

Од почетокот на прекуграничната полициска соработка, наречена „Проект Медуза“, во април, европските истражители соопштија дека идентификувале 156 сторители и жртви и отвориле над 270 нови траги.

Досега се уапсени 57 осомничени.

Но вистинскиот обем на овие кривични дела и бројот на жртви не е познат и „речиси сигурно е недоволно пријавен“, според британската НЦА.

„Сексуалниот напад олеснет со дрога повеќе не е изолирано однесување, туку сè почесто организиран, спроведуван преку координирани мрежи и овозможен од дигитални платформи, што бара пософистициран оперативен одговор“, изјави Најџел Лири, заменик-директор во НЦА.

Си-ен-ен разоткри онлајн „школа за силување“ — мажи споделувале снимки на кои си ги дрогираат сопругите, имало и преноси во живо

„Најужасното што сум го видела“

Сторителите се обидуваат да ги „објективизираат и дехуманизираат“ жртвите, а во некои случаи злоупотребата трае со децении, соопшти „Европол“, кој ја координира операцијата.

„Тие користат енкриптирани сервиси за пораки, форуми и затворени групи за разговор за да разменуваат искуства, да го нормализираат насилното однесување, да олеснат нелегална трговија со лекови на рецепт и со наркотици и да координираат криминални дела“, се додава.

Во овие онлајн групи, сторителите разменувале информации за тоа кои дроги да се користат, како да се применат, како да се избегне откривање, и барале и споделувале видеа и фотографии од злоупотребата.

Сиобан Блејк, водечка обвинителка за силување и тешки сексуални злосторства во британската Кралска обвинителна служба, изјави дека злоупотребата „е една од најужасните што сум ги видела во мојата кариера“.

„Жртвите се изложени на ужасни сексуални злосторства во сопствените домови, што претставува крајно кршење на довербата“, рече таа.

Полицијата предупредува дека жртви можат да бидат луѓе од која било возраст или потекло, и ги повика сите што се сомневаат дека биле жртви на сексуален напад да се јават.

Во Европа во последните години имало неколку апсења и пресуди на мажи обвинети или прогласени за виновни за дрогирање и силување на своите онесвестени партнерки.

Доминик Пелико беше осуден на 20 години затвор во 2024 година за организирање на дрогирање и силување на неговата тогашна сопруга Жизел. Уште 50 сторители беа осудени.

Минатата година, германскиот државјанин Фернандо П. беше прогласен за виновен за дрогирање и силување на својата онесвестена сопруга со години и споделување видеа од злосторствата онлајн, и беше осуден на осум години и шест месеци затвор.

Во април, полските власти уапсија маж поврзан со наводно силување. Полските медиуми го идентификуваа уапсениот како „Пјотр“, псевдонимот даден на Полјакот во центарот на истрагата на Си-ен-ен и еден од речиси 1.000 корисници во приватна група на Телеграм посветена на споделување совети за дрогирање и силување на партнерки.

Експерти за Си-ен-ен изјавија дека сторителите на вакви дела постојано ги менуваат методите, што го отежнува нивното изведување пред суд.

Исто така, постојат ограничени податоци за распространетоста на овие злосторства, а преживеаните повикуваат регулаторите поактивно да ги уриваат онлајн платформите што содржат експлоататорски материјали.

Полициската операција, според „Европол“, е „прва од ваков вид“, а вклучените се надеваат дека со здружување на силите, органите на редот од повеќе земји ќе успеат да изнесат на виделина злоупотреба што „напредува во тајност онлајн и зад затворени врати“.

Најстроги казни за силувачите на Жизел Пелико, правда за сите жени во Франција