Службата за имиграција и царина на САД (ИЦЕ) уапси 10.000 луѓе за само пет дена на крајот на јуни, што претставува големо интензивирање на спроведувањето на политиката за масовна депортација на администрацијата на американскиот претседател Доналд Трамп.

Информациите ги откри лице запознаено со случајот под услов на анонимност, бидејќи информациите сè уште не се објавени. Тие доаѓаат откако ИЦЕ го промени својот пристап: наместо рации со висок профил во големите американски градови, агенцијата се сврте кон подискретни методи за да ги оствари целите на Трамп за депортација.

Бројките покажуваат дека администрацијата повеќе не е фокусирана на спектакуларни акции во одредени градови, туку дека апсењата продолжуваат и значително се зголемуваат. Во текот на петте дена, од петок до вторник, беа уапсени околу 10.000 луѓе, што одговара на просек од приближно 2.000 апсења дневно, пишува Асошиејтед прес.

Не е познато каде се извршени сите акции. Зголемувањето на апсењата првпат го објави „Њујорк тајмс“.

„Од првиот ден, агентите на Министерството за внатрешна безбедност го исполнуваат ветувањето на претседателот Трамп кон американскиот народ да ги пронајдат, апсат и депортираат нелегалните имигранти кои извршиле кривични дела, вклучувајќи убијци, силувачи, педофили, членови на банди и терористи. Нашата порака е јасна: Ако влезете нелегално во нашата земја, ние ќе ве пронајдеме, ќе ве уапсиме и ќе ве депортираме“, се вели во соопштението на Министерството за внатрешна безбедност на САД.

Веста за големиот број апсења доаѓа во време кога бројот на луѓе што се притвораат во центрите за притвор на ИЦЕ се искачи на околу 39.000 во јуни, откако се движеше околу 30.000 месечно од февруари, јавува Асошиејтед прес.

ИЦЕ не објавува јавно статистика за апсења, што го отежнува споредувањето на резултатите со претходните периоди. Но, податоците доставени до Проектот за податоци за депортација на Калифорнискиот универзитет во Беркли, кои беа анализирани од Асошиејтед прес, покажуваат дека просечно 2.000 апсења дневно би претставувале значително зголемување во однос на претходните месеци.

Најголем број апсења досега беа во декември, кога ИЦЕ просечно приведуваше 1.283 луѓе дневно низ САД. Во јануари, кога администрацијата распореди стотици службеници за спроведување на имиграцијата во областа на Минеаполис, дневниот просек беше околу 1.212 апсења.

Минеаполис стана пресвртница во спроведувањето на политиката за масовна депортација на Трамп, откако двајца американски државјани беа убиени од службеници за спроведување на имиграцијата за време на протестите против рациите.