Само неколку часа пред стартот на натпреварот (23.00 часот) од осминафиналето на Светското фудбалско првенство помеѓу Франција и Парагвај, Меѓународната фудбалска федерација, ФИФА, излезе со предупредување поради неповолните временски услови кои би можеле сериозно да влијаат врз мечот во Филаделфија.

ФИФА соопшти дека ризикот од одложување на натпреварот во моментов е многу висок.

– Внимателно ги следиме временските услови во Филаделфија. Во овој момент, постои значителен ризик од одложување поради временските услови. Ќе продолжиме да ја следиме ситуацијата и да ја информираме јавноста – соопшти ФИФА.

За Французите, веќе имаат вакво искуство, за време на групната фаза, на истиот стадион, нивниот натпревар против Ирак беше прекинат повеќе од два часа поради силни бури во Филаделфија.

Според најновите прогнози, се очекува температурите да бидат помеѓу 36 и 38 степени Целзиусови на почетокот на натпреварот, додека субјективната температура би можела да достигне и до 41 степен. Во исто време, метеоролозите предвидуваат врнежи од дожд и грмотевици во точното време кога е закажано да се одржи натпреварот.

Строг безбедносен протокол

И покрај предупредувањето, времето на почеток засега останува непроменето и се очекува натпреварот да започне според планот. Доколку се открие удар од гром во радиус од 13 километри од стадионот, се активира строгиот безбедносен протокол пропишан за Светското првенство. Во такви случаи, натпреварот се прекинува или одложува, играчите се повлекуваат во соблекувалните, а гледачите мора да побараат засолниште.

Натпреварот може да продолжи само 30 минути по последниот регистриран удар од гром.