Мароканската фудбалска репрезентација го дозна својот противник во четвртфиналето на Светското првенство, а тоа ќе биде француската репрезентација, која во Филаделфија го победи Парагвај со 1:0 во вториот натпревар од осминафиналната фаза.

Откако сензационално ја елиминираа Германија, Парагвајците овој пат немаа сила и квалитет да им одолеат на силните „триколори“ кои долго време се мачеа, и дури во средината на второто полувреме успеаја да ја крунисаат својата супериорност на теренот.

Треба да се каже дека натпреварот се играше во пеколни услови, во Филаделфија во саботата беше близу 40 степени Целзиусови.

Во првото полувреме видовме неверојатна дефанзивна изведба на Парагвајците, слична на онаа против Германија. Французите не добија ништо од поседот на топката, а имаа нереални 81 процент во првото полувреме. Но, освен неколку обиди од далечина, не успеаја да создадат никаква значајна акција. Од друга страна, Јужноамериканците ретко ја преминуваа својата половина, но одбраната беше солидна.

Пенал за Франција

Селекторот Дидие Дешан го внесе Дуе во игра и тоа се исплатеше, крилниот напаѓач на Пари Сен Жермен изнуди пенал во 66 минута откако беше фаулиран од Гомес.

Сигурен од белата точка беше Килијан Мбапе, што беше негов седми гол на првенството, исто колку што има и Лионел Меси (Аргентина) на врвот на листата најдобри стрелци на Мундијалот.

Парагвајците беа немоќни во нападот и не успеаја да создадат ништо за израмнување. Имаа само еден удар, но беше лесен за Мењон. Од друга страна, Жил чудесно ги одбрани ударите на Мбапе двапати на крајот.