Постојат песни што времето не ги брише и пријателства што вечно живеат во нотите. Коки Јанков, едната половина од култното дуото „Дуле и Коки“, на својот инстаграм-профил ги потсети следбениците на „златните времиња“ споделувајќи фотографии кои се вистинско богатство на македонската музичка историја.

На едната фотографија, тие се млади, полни со ентузијазам во студиото на Валентино Скендеровски, додека ја создаваат безвременската „Виолина и гитара“. На втората  фотографија се овековечени нивните реакции откако дознаа дека се победници на „Макфест“.

„Ако е нешто легендарно, тогаш првата слика е од снимањето на Виолина и гитара, кај Валентино Скендеровски во неговото студио. Втората слика е пет минути откако ни кажаа дека сме победиле на „Макфест“ (истата година). Сеќавања. Се гледаме на 14 ноември во Македонската филхармонија, после 30 години од фотографиите“.

На 23 септември оваа година се навршуваат 13 години откако на само 39 години македонската сцена го загуби прекрасниот глас и боемската душа на Душан Љубисављевиќ – Дуле. Иако тој физички не е тука, неговиот дух живее преку секој допир на виолината на Коки.

Токму затоа, претстојниот концерт на 14 ноември во Македонската филхармонија нема да биде само обичен настап. Тоа ќе биде патување низ времето, навраќање на тие „златни денови“ и достоинствено одбележување на три децении од моментот кога „Виолина и гитара“ ги освои нашите срца.