Основачот и фронтмен на американскиот рок-бенд „Три дорс даун“ (3 Doors Down), Бред Арнолд, почина на 47 години по борба со рак на бубрегот. Членовите на бендот ја потврдија тажната вест на социјалните мрежи.

„Со тешко срце ја споделуваме веста дека Бред Арнолд, основач, главен пејач и текстописец на „Три дорс даун, почина во саботата, на 7 февруари, на 47-годишна возраст. Со својата сакана сопруга Џенифер и семејството покрај себе, мирно замина, опкружен со најблиските, во сон, по храбрата борба со ракот“, стои во објавата на бендот.

Тие додадоа дека Бред помогнал во преобликувањето на современата рок-музика со емотивни текстови и лирски теми кои допреа многу слушатели.

„Неговото пишување стана темел за цела генерација, создавајќи неколку хитови од 2000-тите, вклучувајќи го и големиот хит ’Kryptonite‘, кој го напиша на час по математика кога имаше само 15 години. Неговата музика одекнуваше далеку надвор од сцената, создавајќи моменти на поврзаност, радост, вера и заеднички искуства кои ќе живеат долго по неговите настапи“, се наведува во објавата.

Тие исто така нагласуваат дека Бред бил пред сè верен сопруг на Џенифер, а неговата добрина, хумор и великодушност допреле до сите кои имале среќа да го познаваат.

„Тие што му беа најблиски ќе го паметат не само неговиот талент, туку и неговата топлина, скромност, вера и длабока љубов кон семејството и пријателите. Семејството е длабоко благодарно за изразената поддршка и љубов во овие тешки моменти и љубезно молат да се почитува нивната приватност. Ќе ни недостасува и засекогаш ќе го паметиме“, порачаа тие.

Во мај 2025 година, Бред Арнолд откри дека му е дијагностициран рак на бубрег во четвртиот стадиум, но рече дека не се плаши и се заблагодари на обожавателите, замолувајќи ги да се молат за него.