Актерката Линдзи Лохан веќе 10 години живее далеку од Холивуд, а како своја дестинација го избра Дубаи. Во екот на иранските напади на Блискиот Исток таа во моментов се наоѓа таму со семејството, а според пишувањето на „ТМЗ“, сите се на сигурно.

Лохан се огласи и на својот Инстаграм со кратка порака.

Лохан живее во Дубаи од 2015 година, а со својот сегашен сопруг Бадер Шамас почнала да се гледа во 2020 година. Се свршија во 2021, се венчаа следната година, а една година подоцна го добија синот Луаи. Актерката неодамна позираше за насловната страница на „Вог Арабија“, каде што откри дека сака да живее во Дубаи поради „спокојот и мирот“ што ги пронашла далеку од папараците.

Поради ескалацијата на конфликтот на Блискиот Исток, нејзините обожаватели изразија загриженост, по што таа се огласи со кратка порака за мир на својата инстаграм-приказна:

„Се молам за мир. Чувајте се сите. Нека нè благослови Бог“.

Лохан претходно изјави дека го обожава Дубаи затоа што ја почитува приватноста и речиси воопшто не толерира папарацо-култура каква што владее во Холивуд. Според неа, градот ѝ го дал она што Лос Анџелес никогаш не можел – мир, анонимност и живот без постојано присуство на камери.

Да потсетиме, Лохан е една од бројните познати личности што живеат во Дубаи, каде што во моментов има ограничувања во авионскиот сообраќај. Странски, но и регионални инфлуенсери се огласуваат на социјалните мрежи, повикувајќи на смиреност и истакнувајќи дека има многу дезинформации, додека градот продолжува да функционира нормално.