После долга неизвесност, фудбалскиот клуб Ренова поради финансиски причини одлучи да не партиципира следната сезона во Првата македонска фудбалска лига.

„Гипсарите“ со официјално писмо се обратиле до Фудбалската федерација на Македонија (ФФМ) дека нема да учествуваат во елитата и тоа значи дека автоматски треба да бидат префрлени во најнизок ранг, односно во четвртата општинска лига.

И натаму нема официјална информација од ФФМ дали шампионатот ќе започне со 11 екипи и дали Ренова ќе биде исфрлена од сите натпреварувања следната сезона или нема да учествува само во првенството. Покрај целосниот распоред на натпревари за новата сезона во 1МФЛ, Ренова се најде и меѓу екипите во Купот на Македонија, а за ривал го добија Љуботен.

Во својата историја Ренова еднаш беше првак во ПМФЛ, во сезоната 2009/10, а еднаш го кренаа и трофејот во Купот на Македонија во 2013. Сега, клубот треба да се реструктурира и да почне да се враќа на старите патеки преку натпреварувачкиот систем при ФФМ.

ФК Ренова од Џепчиште 17 години беше еден од најстабилните тимови во Првата фудбалска лига. Го освои првенството во сезоната 2009/2010, а две години подоцна беше победник и во Купот. Шестпати ја претставуваше Македонија во европските клупски натпреварувања.