Европската Унија потрошила 1,720 милијарди евра за здравствена заштита во 2023 година, што е околу 10 проценти од бруто-домашниот производ (БДП), објави денес Евростат.

Статистичката служба на ЕУ вели дека Германија го забележала највисокото ниво на тековни трошоци за здравствена заштита меѓу земјите од Европската Унија, кое изнесувало околу 492 милијарди евра. По нив следуваат Франција (325 милијарди евра), Италија (179 милијарди евра) и Шпанија (138 милијарди евра). Во однос на нејзиниот бруто-домашен производ, Германија, исто така, го забележала највисокиот сооднос, бидејќи моменталните трошоци за здравствена заштита биле еквивалентни на 11,7 проценти од БДП.

Франција се најде на второ место (11,5 проценти), а Австрија и Шведска на трето (и двете по 11,2 проценти), објавува Танјуг. Спротивно на тоа, тековните трошоци за здравствена заштита учествуваа со помалку од седум проценти од БДП во Луксембург, Романија (и двете 5,7 проценти), Унгарија (6,4) и Ирска (6,6).