Германските производители на автомобили го започнуваат своето најдлабоко реструктуирање за да ги спречат загубите предизвикани од навлегувањето на кинеските конкуренти. Аналитичарите предупредуваат дека ударот би можел трајно да го ослаби ‘рбетот на најголемата европска економија, а „Фолксваген“, „БМВ“ и „Мерцедес-Бенц“ се подготвуваат да отпуштат десетици илјади работници, објавува „Фајненшл тајмс“.

„Фолксваген“ подготвува масовни отпуштања
„Фолксваген“ се подготвува да ги прошири мерките за намалување на трошоците со намалување на до 100.000 работни места во наредните години и затворање на производството во четири фабрики во Германија.

Компанијата со седиште во Волфсбург веќе објави планови за намалување на 50.000 работни места во Германија до крајот на 2030 година, но според лице запознаено со ситуацијата, најновиот план би можел да доведе до отпуштање на уште 50.000 луѓе. Отпуштањето на 100.000 работни места од вкупно околу 625.000 вработени би го рангирало овој потег меѓу најголемите корпоративни отпуштања во историјата.

„Дури и со вакви намалувања, прашање е дали ќе можат да го предвидат кинескиот бран и да вратат дел од профитабилноста, наместо само да го забават крварењето“, рече аналитичарот на UBS, Патрик Хумел.

Реструктуирање и во БМВ и Мерцедес

БМВ неодамна ги предупреди инвеститорите дека планира да потроши до 1 милијарда евра за трошоци за реструктуирање, што, според аналитичарите, би можело да доведе до елиминација на до 10.000 работни места и намалување од 15 проценти на европското производство на автомобили. Од таа објава во средината на јуни, акциите на БМВ паднаа за 13 проценти.

Производителот со седиште во Минхен веќе посочи дека очекува да ја намали својата глобална работна сила за до 5 проценти оваа година, што би можело да значи отпуштање на дури 7.700 луѓе. Хумел проценува дека најновите мерки би можеле да ја зголемат таа бројка на речиси 10.000. БМВ одби да коментира за обемот на намалувањето на трошоците, додека новиот извршен директор Милан Недељковиќ ја нагласи потребата компанијата „значително да ги интензивира и забрза“ своите напори за намалување на трошоците.

Мерцедес-Бенц им соопшти на вработените во Германија дека летните бонуси нема да бидат исплатени, бидејќи компанијата ги засилува мерките за намалување на трошоците. Околу 5.500 вработени веќе доброволно се откажаа од работа. Компанијата, исто така, предупреди дека германското производство влијае врз конкурентноста на трошоците и процени дека производството веднаш ќе се подобри за 15 проценти ако работниците се вратат на 40-часовна работна недела од 35-часовната недела што е во сила од 1995 година.

„Мораме итно да продолжиме да ги намалуваме трошоците за да останеме ценовно конкурентни. И покрај сите наши напори, ситуацијата во Германија е критична денес“, соопшти компанијата.

Губење на пазарниот удел и пенетрација на Кина
Сите европски производители на автомобили – од Стеланттис, Рено до Форд – ги рационализираа операциите во последните години, но пенетрацијата на БИД и другите кинески брендови драматично се забрза оваа година поради забавувањето во Кина. Во мај, Фолксваген, Мерцедес-Бенз, Стелантис и Рено  изгубија пазарен удел и покрај тоа што продажбата на нови автомобили во Европа порасна за 4 проценти.

Во исто време, комбинираниот пазарен удел на БИД, Чери и другите кинески производители на автомобили надмина 10 проценти за прв пат, според податоците од европското здружение на автомобилската индустрија Ацеа.

„Единственото нешто што можете да го направите е да ги намалите трошоците, а единственото значително намалување на трошоците е преку вишокот капацитет. А убедливо најскапиот капацитет во светот е во Германија“, рече аналитичарот на Citi, Харалд Хендриксе.

Томас Бесон, раководител на автомобилските истражувања во Kepler Cheuvreux, додаде:

„Сите европски играчи денес губат. Ситуацијата е исклучително предизвикувачка бидејќи кинеските производители растат во Европа многу побрзо од очекуваното, додека европските губат обем во Кина и се соочуваат со многу неповолни услови во САД, особено поради царините.“

Постојано намалување на германската автомобилска индустрија
Обемот на потенцијалните нови намалувања покажува дека кризата што ги погодува Фолксваген и неговите конкуренти достигнува „нова димензија“, рече Хелена Визберт, професорка по автомобилска економија на Универзитетот за применети науки Остфалија во Волфсбург.

„Автомобилската индустрија во Германија се намалува, и тоа на траен начин“, заклучи таа.

Иако БМВ беше единствениот европски производител што ја зголеми продажбата на континентот во мај, групацијата ги шокираше инвеститорите овој месец со значително намалување на прогнозата за профит, припишувајќи го ова на падот во Кина и влијанието на војната во Иран.

„БМВ беше сметан од речиси сите за најдобра куќа во тешка населба, а тој статус е изгубен со ова предупредување за профит“, рече Хумел од УБС, додавајќи дека инвеститорите се подготвуваат за понатамошни намалувања на прогнозите и од други европски производители.