ЕКСКЛУЗИВНО | Аријана Гранде се пофали со уникатен џемпер „Made in Macedonia“: Познатата пејачка со селфи во дизајн на Алек Бимбилоски за светскиот бренд „Loewe“
Светски познатата пејачка Аријана Гранде ужива во носење на џемперот на „Loewe“, во објава на стори на нејзиниот инстаграм-профил. Но, малкумина знаат дека всушност ова парче е изработено во Македонија, по финиш дизајн на нашиот Алек Бимбилоски.
Се работи за еднобоен бел волнен џемпер од светски познатата модна марка „Loewe“ во релаксиран крој, на кој со црн вез од плетенина е рачно извезен ликот на Чихиро, девојчето од „Spirited Away“, јапонскиот анимиран фантастичен филм.
Џемперот со висока ролка е дел од моментално актуелната капсулна колекција „Loewe X Spirited Away“, и на сајтот на светскиот бренд е достапен по цена од 1700 долари.
View this post on Instagram
Пејачката го прикажа ова македонско дело на селфи фотографија на стори на нејзиниот личен инстаграм-профил, а на самата фотографија додаде емотикон срце до името на тагнатиот бренд „Loewe“.
Зад соработката со марката стои македонскиот дизајнер Алек Бимбилоски, косопственик на македонскиот бренд „Румор“, а соработката е всушност тесно поврзана со јапонското студио за анимација „Ghibli“.
“Соработката со „GHIBLI“ е започната од март минатата година и се базираше на упатства и насоки од нивна страна и конечна заокружена верзија на предлози од наша страна кои требаа да бидат прифатени. Се работи за домашна рачна изработка, но со првокласни италијански предива“, објасни Алек во ексклузивна изјава за Слободен Печат.
View this post on Instagram
Дека соработката е успешна говори сам за себе фактот дека колекцијата која ја изработиле за „Loewe“ е веќе распродадена, и тоа во рекордно време.
„Многу познати ликови си најдоа свое омилено парче од оваа колекција меѓу кои и Аријана Гранде која се пофали на својот инстаграм-профил. Тоа што беа задоволни од сработеното резултираше со потпишување на договор за следен проект. За изведба на нарачаното имаме ангажирано околу осумдесетина наши плетачки кои мораат да ги познаваат специфичните техники на рачна изработка за да ги задоволат потребните критериуми за квалитет на изведба, што пофално говори за домашниот капацитет со кој можеме да се пофалиме“, додаде Алек.
Колекцијата брои многу парчиња изработени под етикетата „Made in Macedonia“, меѓу кои и најскапото плетено парче, кое чини 6400 долари, а за чија рачна изработка биле потребни „само“ 6 недели.
View this post on Instagram