Градоначалникот на Истанбул Екрем Имамоглу ја објави својата кандидатура за претседател на Турција.

Имамоглу, преку видео ја објави својата кандидатура, велејќи „Јас не сум кандидат само за позицијата, туку за тешка трка“.

„Почитувани членови на Републиканската народна партија, драги мои сограѓани. Го започнувам моето патување прво да бидам претседателски кандидат, а подоцна да станам претседател на државата. Не трчам за позиција, туку за тешка трка. Мојот сон, мојата визија е да ги обновам структурите на државата кои актуелната власт ги уништи, да ги обновиме здравството, образованието, правдата. Државата не треба да биде за интересите на грст народ, туку треба да припаѓа на народот и да биде бранител на интересите на народот. Сите заедно можеме да го постигнеме ова“, изјави тој.

Инаку, на крајот на февруари Имамоглу преку својот адвокат поднел барање за учество на прелиминарните избори на кои ќе се утврдува кандидатот на ЦХП за претседател на Турција.

Во судот во Истанбул против него се води кривична постапка за навреди и закани упатени кон турските власти кои според обвинението се водат како случаи на тероризам. Ако биде осуден за кривичните дела за кои се товари, Имамоглу ќе го загуби правото на глас и да биде избран и нема да може да извршува јавна функција додека трае казната.