Џеф Безос и Лорен Санчез ќе преземат нова улога на најголемиот моден настан во светот, прогласени се за почесни ко-претседатели на годинешната Мет Гала, покрај веќе потврденото спонзорство на најважната модна вечер во годината, пренесува „Пејџ сикс“.

Нјујоршкиот Метрополитен музеј на уметност и Костим Институтот уште посилно ја поврзуваат најскапата фигура од технолошкиот свет и неговата партнерка со овој гламурозен хуманитарен настан, кој традиционално се опишува како „забавата на годината“.

Заедно со Џеф Безос и Лорен Санчез, вечерта ќе ја предводи и ѕвезден тим на ко-претседатели – Бијонсе, Никол Кидман, Венус Вилијамс и Ана Винтур – што јасно покажува колку Мет Гала се потпира на симболичната моќ на поп-културата. Темата на годинашната вечер, „Костимска уметност“, со дрес-код „Модата е уметност“, ја нагласува врската помеѓу модата и музејската уметност, а токму Безос и Санчез ќе ја поддржат финансиски како главни приватни покровители.

Годинашната Мет Гала ќе се одржи на 4 мај, а ќе ја следи голема изложба „Костимска уметност“ која ќе се отвори на 10 мај во постојаните галерии на Костимографскиот оддел на Метрополитен. Кустосот Ендру Болтон најави поставка која спојува уметнички дела – од слики и скулптури до музејски артефакти – со историски и современи креации од модната архива, при што модата буквално се презентира како уметничко дело. Изложбата ќе биде можна токму благодарение на донацијата од Џеф Безос и Лорен Санчез, со дополнителна поддршка од Сен Лоран и Конде Наст.

Иако Безос и Санчез веќе претходно се појавувале на Мет Гала и го преземале спонзорството, ова е првпат формално да бидат именувани за почесни копретседатели на вечерта. Таа титула обично подразбира истакната позиција на врвот на скалите на Метрополитен и важност во протоколот на настанот, со што парот дополнително се позиционира како дел од највлијателниот круг гости. Нивната сè поблиска врска со Ана Винтур започнала уште во 2023 година, кога Санчез добила пофален профил во Вог, а кулминирала со дигиталната насловна страница по гламурозната венчавка на парот во Венеција во 2025 година.

Откако е објавено дека токму Безос и Санчез стојат зад најголемиот дел од трошоците на Мет Гала и придружната изложба, социјалните мрежи не престануваат да зборуваат за (не)соодветноста на ваквото спонзорство. Критичарите на Безос го навредуваат за огромното богатство и влијание на „Амазон“, но и за тоа што модниот свет – кој сè почесто се повикува на одржливост и транспарентност – со задоволство го прифаќа неговиот капитал. Дел од обожавателите на Мет Гала дури најавиле бојкот на годинашното издание, со обвинувања дека во официјалните најави се обидело да се „прикрие“ колку парот навистина е финансиски вклучен.

Ана Винтур на критиките одговара отворено, истакнувајќи ја Лорен Санчез како „голема љубителка на костимите и, очигледно, на модата“ и ја нагласува нејзината великодушност кон Костим Институтот. Винтур потсетува дека Мет Гала пред сè е хуманитарна вечер за собирање средства, а тоа што силни приватни покровители овозможуваат амбициозни изложби како „Костимска уметност“ е од големо значење. Во позадина, се уште се шират шпекулации за амбициите на Безос кон модните и медиумските куќи како Конде Наст, иако за потенцијални аквизиции сè уште нема конкретни потврди.

Влегувањето на Џеф Безос и Лорен Санчез во највниот круг на Мет Гала симболично потврдува колку светот на големата технологија е испреплетен со луксузната мода. За Мет тоа значи стабилна финансиска поддршка, изложба во новите постојани галерии и невиден медиумски публицитет, додека за парот претставува билет во елитната културна историја, редејќи се до семејствата Астор, Витни и Вандербилт. Од друга страна, дел од публиката сè уште се прашува колку „забавата на годината“ се оддалечила од поранешната идеја за гламур како чисто бегство и колку денес служи како огледало на глобалната распределба на моќ и пари.